Franco Foda publikon listën e Kosovës, tre lojtarë ftohen për herë të parë

Përzgjedhësi i Kosovës në futboll, Franco Foda, ka publikuar listën e futbollistëve të ftuar për dy ndeshjet e radhës në kuadër të Ligës së Kombeve. Në listë janë përfshirë edhe tre futbollistë që marrin ftesën e parë nga përzgjedhësi gjerman.

“Dardanët” do të përballen me Izraelin dhe Republikën e Irlandës, në dy sfida të rëndësishme për vazhdimësinë e garës dhe objektivat e Kosovës në këtë kompeticion.

Ftesën e parë për përfaqësuesen e Kosovës e kanë marrë Lindrit Kamberi, Bleon Kurtulusi dhe Enis Rexhepi. Të tre futbollistët pritet ta veshin për herë të parë fanellën e Kombëtares.

Federata e Futbollit e Kosovës ka bërë të ditur se skuadra do t’u hyjë këtyre përballjeve me motivim të lartë dhe përkushtim maksimal, me synimin për të arritur rezultate pozitive.