Bojkoti i lojtarëve trondit Vushtrrinë, klubi: Nuk shantazhohemi nga askush

FC Vushtrria ka reaguar pas bojkotit të një grupi futbollistësh, të cilët, sipas klubit, refuzuan të paraqiten në ndeshjen e sotme, pavarësisht zotimeve të dhëna në një takim të mbajtur një natë më parë. Drejtuesit e klubit e kanë cilësuar situatën si shqetësuese dhe në dëm të Vushtrrisë.

Përmes një reagimi publik, klubi ka pranuar se paga e fundit e lojtarëve ka pasur vonesë prej 20 ditësh. Sipas drejtuesve, kjo vonesë lidhet me procedurat ligjore për sigurimin e dokumentacionit të sponsorizimit.

FC Vushtrria ka bërë të ditur se nuk pranon të vihet nën presion nga veprimet e lojtarëve, duke e përmbledhur qëndrimin me mesazhin se “klubi nuk shantazhohet nga askush”. Reagimi vjen në një moment kur bojkoti i një grupi futbollistësh ka krijuar krizë të drejtpërdrejtë brenda klubit.