Rrëzohet helikopteri i EUFOR-it pranë Brçkos, raportohet për viktima

Një helikopter ushtarak i misionit të EUFOR-it është rrëzuar në fshatin Gorice, pranë Brçkos, në Bosnjë e Hercegovinë. Aksidenti ka shkaktuar viktima dhe të plagosur, ndërsa raportimet fillestare për numrin e tyre janë të ndryshme.

Sipas një bilanci paraprak të bërë të ditur nga kryetari i Brçkos, Siniša Milić, nga rrëzimi raportohet se kanë vdekur tre persona dhe janë plagosur 12 të tjerë. Në raportime të tjera përmenden katër viktima, prandaj shifrat mbeten në zhvillim.

Helikopteri ishte i angazhuar në misionin paqeruajtës të Bashkimit Evropian, EUFOR Althea. Raportohet se bëhej fjalë për një helikopter ushtarak italian të tipit CH-47, i cili u rrëzua në zonën e Brçkos.

Sipas raportimeve fillestare, helikopteri është shkatërruar plotësisht nga rrëzimi. Identitetet e personave të përfshirë dhe rrethanat e sakta të aksidentit nuk janë bërë të ditura në informacionet paraprake.