Arrest shtëpie për drejtuesen e SHISH-it, rast i rrallë në botë

Drejtuesja e Shërbimit Informativ të Shtetit, Vlora Hyseni, është vendosur në arrest shtëpie dhe është pezulluar nga ushtrimi i detyrës. Masat u caktuan nga Gjykata e Posaçme, me kërkesë të Strukturës së Posaçme kundër Korrupsionit dhe Krimit të Organizuar.

Vendimi u mor mëngjesin e 22 shtatorit, ndërsa Hyseni ende ishte në krye të institucionit që mbledh dhe administron informacionin më të ndjeshëm në funksion të sigurisë kombëtare. Për herë të parë në historinë e Shërbimit Informativ të Shtetit, drejtuesja e tij përballet me një masë arresti duke qenë ende në detyrë.

Rasti konsiderohet i pazakontë edhe në planin ndërkombëtar. Sipas të dhënave të publikuara, në botë përmenden vetëm tre raste kur drejtuesve të institucioneve të inteligjencës u janë caktuar masa arresti. Vendimi ndaj Hysenit e vendos kështu rastin në një grup të rrallë, për shkak të peshës së postit dhe natyrës së institucionit që ajo drejtonte.