Zelensky paralajmëron goditje ndaj rafinerive ruse që financojnë luftën

Presidenti ukrainas Volodymyr Zelensky ka paralajmëruar intensifikimin e sulmeve ndaj rafinerive ruse të naftës, të cilat ai i përshkruan si objekte që financojnë luftën. Deklarata u bë në një intervistë, në një kohë kur Rusia ka hyrë në një fazë të re të sulmeve ajrore ndaj infrastrukturës ukrainase.

Sipas Zelenskyt, Ukraina synon të godasë më fuqishëm këto objekte si përgjigje ndaj sulmeve ruse. Ai nuk ka njoftuar detaje për kohën, vendndodhjen apo përmasat e veprimeve të ardhshme.

Presidenti ukrainas ka kritikuar sërish edhe presidentin rus Vladimir Putin. Zelensky ka thënë se përpjekja për të hyrë në negociata me të është humbje kohe, duke e lidhur këtë qëndrim me mënyrën se si Moska i trajton kompromiset në procesin e bisedimeve.