Ismaili i kërkon Kurtit: Mos u fshih pas Deharit, eja konstituo Kuvendin

Nënkryetari i PDK-së, Uran Ismaili, i bëri thirrje sot kryetarit të Vetëvendosjes, Albin Kurti, që “mos të fshihet pas Avni Deharit” dhe t’i thërrasë seancën konstituive për të konstituuar Kuvendin e Republikës së Kosovës. Sipas Ismailit, sot bëhet një javë prej ditës kur, siç tha ai, ka pushuar funksionimi i Kushtetutës dhe i ligjit.

Ismaili akuzoi se mbi institucionet po përpiqet të sundojë “një individ dhe një parti” dhe tha se Grupi Parlamentar i Partisë Demokratike të Kosovës i ka dërguar sërish kërkesë kryesuesit të seancës konstituive, Avni Deharit, që ta thërrasë vazhdimin e seancës.

Ai deklaroi se, sipas tij, “për herë të parë në Kosovë suspendohet Kushtetuta dhe Kuvendi” dhe shtoi se kjo po bëhet për agjendë personale të një individi. Ismaili kërkoi veprim të menjëhershëm për rikthimin e funksionimit të institucioneve.

PDK-ja, sipas Ismailit, pret thirrjen për vazhdimin e seancës nga kryesuesi Avni Dehari; mbetet e paqartë nëse dhe kur seanca do të rifillojë.