Alarm në Ngushticën e Hormuzit, cisterna përfshihet nga flakët pas goditjes me raketë

Alarmi u dha pasditen e 1 tetorit në Ngushticën e Hormuzit, ku një anije cisternë që lundronte në zonë u raportua se u godit nga një raketë e panjohur. Goditja shkaktoi zjarr në anije dhe incidenti ka ngritur shqetësim në këtë korridor të rëndësishëm detar.

Sipas përditësimit emergjent të EOS Marine dhe sistemit MarSec, ngjarja ndodhi në orën 17:50 sipas kohës UTC, ose në orën 20:50 sipas kohës greke. Raportet fillestare tregojnë se të gjithë anëtarët e ekuipazhit janë shëndoshë e mirë.

Ende nuk dihet shkalla e dëmeve të shkaktuara në cisternë dhe nëse zjarri ka pasur ndikim në mjedis. Hetimi për incidentin është duke vazhduar, ndërsa anijeve që operojnë në zonë u është kërkuar të mbajnë mbikëqyrje të vazhdueshme vizuale dhe me radar, të zbatojnë masat mbrojtëse dhe të raportojnë çdo aktivitet të dyshimtë tek autoritetet lokale.