KFOR sqaron kush vendos për hapjen e Urës së Ibrit

KFOR ka sqaruar se nuk ka mandat të përcaktojë nëse Ura e Ibrit në Mitrovicë duhet të hapet apo jo. Sipas misionit të NATO-s në Kosovë, vendimi u takon Bashkimit Evropian dhe institucioneve përkatëse të Kosovës.

Misioni ka njoftuar gjithashtu për përditësimin e procesit të optimizimit të pranisë së tij në Kosovë. Ky proces po zhvillohet gradualisht, në mënyrë të koordinuar dhe transparente me institucionet e Kosovës, BE-në, Policinë e Kosovës dhe EULEX-in.

KFOR ka theksuar se mandati i tij mbetet i pandryshuar dhe se siguria e të gjitha komuniteteve vazhdon të jetë prioritet. Vendimet për praninë e KFOR-it në urë bazohen në vlerësimin e situatës së sigurisë.

Kalimi gradual nga prania e përhershme e KFOR-it në Urën e Ibrit është pjesë e këtij procesi të optimizimit. KFOR ka bërë të ditur se ky proces mund të kthehet prapa nëse zhvillimet e ardhshme ndikojnë në sigurinë afatgjatë në Kosovë ose në stabilitetin rajonal.