Ndalohen punimet në 9 gurthyes ilegalë, shtatë në Suharekë e dy në Skenderaj

Janë ndaluar punimet në nëntë gurthyes ilegalë, shtatë në komunën e Suharekës dhe dy në Skenderaj, ka njoftuar ministrja në detyrë e Mjedisit dhe Planifikimit Hapësinor, Fitore Pacolli. Aksioni ishte pjesë e ndërhyrjeve të Inspektoratit të ministrisë dhe synon të ndalojë aktivitetet që kryhen pa leje.

Sipas njoftimit, inspektorati i kësaj ministrie ndërhyri ndaj nëntë gurthyesve që vepronin në kundërshtim me ligjin, pa dokumentacionin e nevojshëm për ushtrimin e veprimtarisë. Autoritetet njoftuan se shtatë objekte u ndaluan në Suharekë dhe dy në Skenderaj, ndërsa inspektimet vijojnë në terren.

Pacolli shkroi në Facebook se ky aksion vjen pas analizës së dosjeve të mbi 200 gurthyesve dhe se ndërhyrjet në terren do të vazhdojnë. Ajo paralajmëroi se çdo subjekt i kapur duke vepruar jashtë ligjit do të përballet me masa, ndërsa ministria nuk do të tolerojë aktivitetet që dëmtojnë mjedisin.