Serwer e quan të papranueshme paraburgimin pesëvjeçar të ish-krerëve të UÇK-së

Ish-diplomati amerikan Daniel Serwer e ka cilësuar të papranueshme mbajtjen e ish-krerëve të Ushtrisë Çlirimtare të Kosovës në paraburgim për pesë vjet, duke kritikuar ashpër punën e Dhomave të Specializuara të Kosovës në Hagë.

Serwer ka deklaruar gjithashtu se është penduar që e kishte mbështetur themelimin e kësaj gjykate. Qëndrimi i tij paraqet një ndryshim të qartë në vlerësimin që kishte për institucionin dhe mënyrën e funksionimit të tij.

Sipas deklarimit të tij, fillimisht e kishte përkrahur Gjykatën Speciale me bindjen se ajo do të hetonte pretendimet për trafikim të organeve njerëzore, të ngritura në raportin e ish-senatorit zviceran Dick Marty.