Hamza: Nisma për Specialen nuk synon mbylljen e saj

Kreu i PDK-së, Bedri Hamza, ka sqaruar se nisma për projektligjin për Gjykatën Speciale nuk synon mbylljen e Dhomave të Specializuara. Ai e bëri këtë sqarim gjatë mbledhjes së Këshillit Drejtues të PDK-së, ku foli për përmbajtjen e projektligjit.

Sipas Hamzës, nisma synon rishikimin e fushëveprimit të Dhomave të Specializuara. Çështjet që nuk lidhen me pretendimet e raportit të Dick Martyt, sipas propozimit, do të mund të transferoheshin në sistemin e drejtësisë në Kosovë, së bashku me dosjet, provat dhe materialet përkatëse.

Hamza ka thënë gjithashtu se propozimi parasheh mundësinë e monitorimit nga organizata ndërkombëtare profesionale dhe të pavarura. Monitorimi do të përfshinte standardet e gjykimit të drejtë, kohëzgjatjen e proceseve, kushtet e paraburgimit dhe respektimin e të drejtave të njeriut.