Deliu: ‘Mundësi për konflikt fizik’ nuk justifikon mosthirrjen e seancës

Deputetja e PDK-së Blerta Deliu i reagoi kryesuesit të Kuvendit, Avni Dehari, pasi ai tha se nuk po e thërret seancën me arsyetimin se “mund të ketë konflikt fizik”. Deliu e përshkroi këtë arsyetim si skandaloz dhe i kërkoi që të thërrasë seancën dhe të respektojë rregulloren.

“Ky arsyetim është skandaloz. Seanca nuk thirret sepse ‘mund të ketë konflikt fizik’?! Nëse frika nga tensioni mes deputetëve do të ishte arsye për të mos mbajtur seanca, atëherë Kuvendi i Kosovës s’duhet të kishte qenë i mbledhur asnjëherë në historinë e tij. Kuvendi nuk funksionon vetëm kur partitë pajtohen. Përkundrazi, ekziston pikërisht sepse partitë nuk pajtohen: debatojnë, propozojnë dhe votojnë,” tha Deliu në reagimin e saj.

Deliu përsëriti kërkesën që seanca të thirret dhe rregullorja të respektohet, duke nënvizuar se moslejimi i debatit dhe votimit për shkak të frikës nga përplasjet do të pamundësonte funksionimin normal të institucioneve. Reagimi i plotë i Deliut përmban edhe kritika ndaj mandatit të kryesuesit në këto rrethana.