Vuçiqi i gatshëm për varrim “civilizues” të Mlladiqit, reagon Brukseli

Gatishmëria e presidentit serb Aleksandar Vuçiq për një varrim “civilizues” të Ratko Mlladiqit ka nxitur reagimin e Brukselit. Komisioni Evropian ka theksuar se glorifikimi i kriminelëve të luftës nuk ka vend në vlerat evropiane.

Sipas Komisionit Evropian, u takon autoriteteve të Serbisë të përcaktojnë se çfarë roli do të kenë në funeralin e Mlladiqit. Megjithatë, institucioni evropian ka bërë të qartë se glorifikimi i kriminelëve të luftës është në kundërshtim me vlerat më themelore evropiane.

Qëndrimi i Brukselit vlen si për Bashkimin Evropian, ashtu edhe për vendet kandidate për anëtarësim. Komisioni Evropian e ka lidhur këtë parim drejtpërdrejt me mënyrën se si trajtohen figurat e dënuara për krime lufte.

Bashkimi Evropian e ka cilësuar Mlladiqin kriminel lufte, i cili po vuante dënimin me burgim të përjetshëm për krime kundër njerëzimit dhe gjenocid në Srebrenicë.