Takimi Kurti-Ulutash anulohet për “rrethana të paparashikuara”

Takimi i paralajmëruar mes kryeministrit në detyrë, Albin Kurti, dhe komandantit të KFOR-it, gjeneralmajorit Ozgan Ulutash, nuk u zhvillua dje, ndonëse ishte njoftuar më herët gjatë ditës.

KFOR-i tha se takimi u anulua për shkak “të rrethanave të paparashikuara”. Në njoftim, misioni paqeruajtës i NATO-s në Kosovë bëri të ditur se komandanti Ulutash mbetet në kontakt të ngushtë me të gjithë partnerët, përfshirë përfaqësuesit e institucioneve në Kosovë.

Anulimi i takimit ndodhi në një kohë kur në vëmendje është çështja e Urës së Ibrit dhe procesi i përmendur si “tranzicion” për të. Më herët, gjatë një konference për media, Kurti e cilësoi si “absurde” që ura kryesore mbi Ibër të vazhdojë të jetë e mbyllur.

Kurti tha se, pas ndërtimit të urave të reja, nuk është e arsyeshme që ura kryesore të mbahet e mbyllur. Megjithatë, në njoftimin për anulimin e takimit, KFOR-i nuk dha detaje të tjera për natyrën e rrethanave të përmendura.