KFOR-i po përshtat pozicionimin në veri, gati të përgjigjet nëse nevojitet

KFOR-i po përshtat pozicionimin e tij në veri të Kosovës dhe shprehet i gatshëm të përgjigjet nëse nevojitet. Njoftimi u bë pas vizitës së Shefit të Shtabit të misionit, gjeneral brigade Chad Daniels, te personeli që vepron në Mitrovicë.

Gjatë vizitës, Daniels pa nga afër angazhimin e Njësisë Speciale Shumëkombëshe (MSU) dhe të Ekipeve të Ndërlidhjes dhe Monitorimit (LMT), të cilat mbështesin misionin e KFOR-it në Mitrovicë dhe në veri të Kosovës.

Sipas deklaratës së Daniels, pjesëtarët e MSU-së kontribuojnë në sigurimin e një pranie të dukshme dhe të lëvizshme të KFOR-it në terren, si dhe në ruajtjen e gatishmërisë së misionit.

Ndërkohë, Ekipet e Ndërlidhjes dhe Monitorimit mbajnë kontakte të rregullta me komunitetet lokale. KFOR-i ka thënë se ky angazhim e ndihmon misionin të krijojë një pasqyrë më të qartë për situatën dhe mjedisin e sigurisë.