Përfundon dita e parë e deklaratave përfundimtare në Hagë

Në Dhomat e Specializuara të Kosovës në Hagë ka përfunduar të enjten dita e parë e deklaratave përfundimtare në rastin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit.

Rasti lidhet me akuzat për pengim të administrimit të drejtësisë. Gjatë deklaratave përfundimtare, Zyra e Prokurorit të Specializuar ka kërkuar dënime për të akuzuarit, ndërsa mbrojtja ka kërkuar lirimin e tyre.

Seanca e deklaratave përfundimtare është paraparë të zhvillohet më 10, 11 dhe 14 shtator. Dita e parë shënon nisjen e kësaj faze të procesit në Hagë, ku palët paraqesin qëndrimet e tyre përfundimtare para trupit gjykues.