Mbetje kockore të dyshuara për 23 persona gjenden në Zubin Potok

Sipas një komunikate të përbashkët të Prokurorisë Speciale, Policisë së Kosovës dhe Institutit të Mjekësisë Ligjore, gjatë gërmimeve dhe ekshumimeve në një lokacion të dyshuar në Zubin Potok janë gjetur mbetje kockore që dyshohet se i përkasin së paku 23 personave.

Instituti i Mjekësisë Ligjore dhe ekipet hetimore po kryejnë ekzaminimet mjeko-ligjore për të përcaktuar identitetet dhe rrethanat e gjetjes. Sipas komunikatës, identifikimi i plotë do të bëhet pas përfundimit të këtyre ekzaminimeve dhe procedurave përkatëse.

Prokuroria Speciale dhe Policia e Kosovës thonë se do të vazhdojnë veprimet hetimore dhe procedurale në koordinim me institucionet kompetente. Aktualisht për këtë rast po hetohen tre persona nën dyshim, ndërsa autoritetet njoftuan se hetimet do të sjellin informacion shtesë në vijim.