Ndalet 22-vjeçarja pas rastit me armë të gjatë në shkollën e Pomozotinit

Një rast me armë të gjatë në oborrin e shkollës “Zejnel Salihu” në Pomozotin të Fushë Kosovës ka marrë zhvillim të ri disa muaj pas regjistrimit të tij. Policia ka ndaluar mbrëmë 22-vjeçaren Arbnora Seferi, e cila ishte identifikuar si e dyshuar në këtë rast.

Ngjarja fillestare ishte regjistruar më 1 prill, kur disa persona kishin hyrë në oborrin e shkollës. Në mesin e tyre ishte parë edhe një vajzë me një çantë, për të cilën dyshohej se brenda saj ndodhej një armë e gjatë.

Hetimet kishin vazhduar edhe në ditët në vijim. Më 9 prill, Policia kishte siguruar praninë e personave të përfshirë në rast, ndërsa gjatë intervistimit Seferi kishte treguar vendndodhjen e armës.

Më pas, në bashkëpunim me njësinë e forenzikës, ishte sekuestruar një pushkë gjuetie me dylbi optike. Arma ishte deponuar në dhomën e dëshmive, ndërsa ndalimi i 22-vjeçares përbën zhvillimin e ri të rastit të regjistruar në oborrin e shkollës.