Rrjedhje uji në rrugën “Rexhep Luci”, ndërhyrja vështirësohet nga betoni

Një rrjedhje uji është paraqitur në rrugën “Rexhep Luci” në Prishtinë, ndërsa KRU “Prishtina” ka nisur punimet për sanimin e defektit. Kompania ka njoftuar se ndërhyrja po vështirësohet për shkak të betonit në pjesën e rrugës ku ndodhet rrjedhja.

Sipas njoftimit të KRU “Prishtina”, valvula është mbyllur mbrëmë për të ndaluar rrjedhjen. Ekipet e kompanisë janë duke punuar sot për rregullimin e problemit dhe për përfundimin e sanimit.

Kompania ka kërkuar mirëkuptimin e qytetarëve për vështirësitë dhe kohën e nevojshme deri në përfundimin e punimeve.