Vrasje në tentativë në Prishtinë, një person plagoset me armë zjarri

Një person është plagosur me armë zjarri në një lokal në rrugën “Lidhja e Pejës” në Prishtinë. Rasti ka ndodhur rreth orës 04:00 dhe Policia e Kosovës e ka cilësuar atë si vrasje në tentativë.

Lajmin e ka konfirmuar Flora Ahmeti, zëdhënëse e Policisë së Kosovës për rajonin e Prishtinës. Sipas saj, personi i plagosur është dërguar për trajtim mjekësor.

Policia, në koordinim me prokurorinë, ka nisur hetimin për rrethanat e rastit. Në njoftimin e dhënë deri tani nuk janë bërë të ditura detaje të tjera për personat e përfshirë apo mënyrën se si ka ndodhur ngjarja.